|
Ma karakata enga axaka Tata Albertu.
Sïránguani, ixú uératini Morelia, enero inchámani jámani.
Arhíntaska ma eiánhperakua enga jimájkani karánhaka enga miiupka
iumu tanimu jurhiátikua imá kutsï enga jingoni k’amáraka indé
uéxurhini enga nitámakía.
Imani eiánhperakuarhu uandásïndi Jurámuti jorhéntpiri p’orhécheri
eskaksï kánikua uétarhixatí arhíntskuecha karákatecha uandakua tua
anápuecheri jimbó, ka ji engani t’arhéxikía ka miuni iápuru isï,
kurhámarhijpesïnga, ¿ambé marhoá engaksï jauaka arhíntskuecha,
engaksï jorhéntpiricha no marhoátauaka ka ískuksï patsákata jatsiani
eskaksï na uni jaká jorhéntpiri p’orhécha? Ji uékapiringa mítini
naniksï marhoátanhaxakí takúkatecha p’orhé jimbó karákatecha.
Jimájkani isï exésïnga eska sánderu uétarhixatí eskaksï
jorhéntpiricha uékaka jorhéntpini uandakua p’orhéni marhoátaparini
ka istu arhíntskuechani engaksï karákata jaká ía, jimboka engaksï
imecha no uékaka marhoátani ambé marhoá engaksï jauaka karákatecha.
Indé jindesti k’eri ánchikuarhikua engaksï Jurámuticha uénaka uni,
xani engaksï ixú jaká Morelia ka imecha engaksï irétecharhu
uaxástakurhika, eska: directores ,asesores técnicos, supervisores ka
jefes de sector arhíkatecha. Kánikua uétarhixatí eskaksï
jorhéntpiricha ménderuni erátsiaka ka jukáparharani juchari uandakua
p’orheni, isï eska uandakua turhísïcheri.
Máteru ambé enga uétarhini jaká, jindesti eskaksï Jurámuticha
jorhéntpiricheri p’orhécheri, jorhéntpiaka na engaksï marhoátauaka
arhíntskuechani, xani iméchani engaksï jingoni jorhéngurhiaka uatsï
sapírhaticha sïranda arhini; xani iméchani engaksï marhioátauaka
engaksï sánderu sani jorhénakía.
Jimájkani Naná Luz, ámbiksï xani uétarhini jakí p’orhéchani jingoni
arhíntskuecha, sánderu uétarhixatí eskaksï marhoátauaka
arhíntskuechani engaksï karákurhitini jaká ía.
Ka
jiníani Japonda K’érirhu uanámukutini, ka ixuani enga jurhiata isï
andárajka pékaksï icha k’o uétarhinchani jaká arhíntskuechani, ¿néchaksï
karauá? Jimbokaksï jorhéntpiricha jinisï anápuecha mándanitarkuksï
uandasïndi uandakua tuá anápuecheri.
Ambiksï uá k’arhájpini, ka nijtu k’arhákurhini, engaksï Jurámuticha
p’orhécheri, náuecheri, mazáuecheri ka otomícheri úndaka arhíjpeni
eskaksï marhoátaka uandakua tuá anápuecheri ka istu arhíntskuechani,
jimájkani kénditanhatiksï ixú uénani Morelia, jimbokaksï isï jimbó
jorhéntpiricha jatsíkurhiasïndi Jurámutichani, parakaksï uaka
ánchikuarhini isï eska iméchamindu na uékaka, ka no eska námindu
uétarhini jaká.
Juchá engaksï k’erénchekuarhu jorhéntpini jaká p’orhé uandakuani,
úpiringaksï jarhoájpini.
Karásti
Tatá
Alberto.
GLOSARIO:
Uandakua tuá anápuecheri = Idioma de los antepasados;
Miuni = conocer
Takúkata = libro
Eskaksï uékaka = que quieran
Mándanitarkuksï =contados, pocos
Kénditanhatiksï = los quitarán del puesto
K’erénchekuarhu = Universidad. |
